اختار ديكور بيتك من سابع جار

تاريخ التحديث: 3 يونيو 2018


مسلسل سابع جار أثبت إن الصدق والبساطة هما أهم حاجة، وإختيار شخصيــــات من واقع حياتنا بيفرق في نجاح أي عمل، وزي ما كان كل الشخصيات والتفاصيـــــل واقعية وموجودة في حياتنا كمان ديكورات البيوت في المسلسل كانت واقعية ونابعة من حياتنا وتشبه للبيوت اللي بنشوفها ولبيوتنا، إحنا عملنا تحليل بسيط لديكور كل بيت كان مميز في المسلسل واللي أكيد يشبه لبيت شوفته في حياتك.

#مسلسل_سابع_جار#الحلقة_الأخيرة_من_سابع_جار#مسلسلات#ممثلين_سابع_جار - #ديكورات



لمياء


لمياء هي ست مصرية بسيطة وبيتها بيعكس بساطتها، الستايل التقليدي اللي فيه تجديدات ميالة للمودرن زي الصالون بطرازه القديم وجنبه كنب مودرن. بيتها بيبين شخصيتها الميالة للتجديد والحداثة بشكل بسيط، هنلاقي في البيت تفاصيل مصرية جدا زي النتيجة المتعــــــلقة في أي مكـــان والبوفيــــه في مدخل الشقـــــة.




ليلى


ست طموحة لكن بيتها بيعكس أزمتها المادية وده كان واضح في صالة بيتها المتواضعة وأوضتها اللي بطراز وفرش تقليدي متواضع وأكتر أوضة في شقة ليلى كان واضح فيها التجديد هي أوضة هالة اللي كان ستايلـها مودرن زي السرير والتسريحة، لكن ليلى إجمالا فضلت محافظة على ستايل بيتها التقليدي.





عمرو

كان كائن ليلي وحياته هادية وكلها خصوصية وده كان واضح في شكل بيته اللي كان أهم حاجة فيه إن يبـــقى سهل يضلمه ويحافظ على إضاءته الهادية طول الوقت، بيت عمرو كان مزيج واضح من الستايل المــــــــودرن والكلاسيكي، استخدام كنبة مودرن مع ترابيزة كلاسيكية كمان البيانو اللي كان موجود، استخدام الخشب في بيته بشكل كبير زي الباب والأرضية الخشب، إختياره للبانوهات في غرفة النوم مع الألوان المودرن. بيت عمرو كان واضح في ديكوره وإختياراته إنه بيعكس شخصيته كفنان.





اللواء عصمت

الشخصية الصارمة اللي كانت واضحة في بداية المسلسل ببيتها الكلاسيكي والأثاث التقليدي، شخصية كانت رافضة التجديد ومعتزة بكل شئ في بيتها. كريمة بشخصيتها المرحة قدرت تخرجه من الحالة دي وتقنعه يجـــدد في بيته لدرجة إنه إختار لون مودرن وجرئ زي الأبيض للحيطة وإختار فرش مودرن ومع ذلك فضل محتفــــــــــظ باللوحة اللي بيحبها وكانت ليها لمسة جميلة على البيت.





نهى وطارق

بيت نهى بيعكس موضة الفترة اللي اتجوزت فيها ومستواهم المادي، بيتها كان ميال للمودرن modern style جدا، من الفرش والألوان وشكل المطبخ، ستايل أوضة نومها مثلا كان مودرن، شكل السرير وترتيب الأوضــــة، تقسيم البيت وتعاملها مع المساحات الضيقة فيه كمان.





مي

بنت متحررة وعملية وعشان كده كانت مقسمة الشقة لجزء تعيش فيه وجزء يكون مكتبها ولأنها مهنـــــــــدسة شاطرة البيت كان بيقول ده، البيت كان ميال للـmodern style، اللون الأبيض والفرش والألوان المبــــــــــهجة، الفرش الصغير والألوان الـbasicكانت بتوضح إنها فاهمة إختياراتها في ديكور المكان، الـbean bagsوالكراسي المختلفة عند الترابيزة كانت لمسة مختلفة وجريئة.





حسن وميادة

حسن صاحب طارق ومراته ميادة اتنين متفاهمين جدا ومتوافقين وحابين حياتهم تكون مريحة وعلى طبيعتها وكمان ستايل بيتهم الشرقي كان بيتكلم عن شخصيتهم، القعدة العربي ولونها النبيتي، الصينية النحــــــــــاس وشكل الكرانيش والسرر بتدل على الذوق الشرقي.



كل شخصية في المسلسل كان ليها طابعها وشخصيتها اللي عكسها ديكور البيت، وزي ما كل حد شاف نفسه أو إصحابه في شخصية من المسلسل أكيد هتشوفها في الديكور، قولنا إنت مين في سابع جار.


121 مشاهدة0 تعليق